पोखरा

आफ्नै नाबालक छोरालाई कुटेर घाइते बनाउने आमालाई प्रहरीले पक्राउ गरेको छ ।

पक्राउ पर्नेमा तनहुँको शुक्लागण्डकी नगरपालिका वडा नं. १० जुवालथरकी ३२ वर्षीया टिकादेवी नेपाली रहेकी छन् । प्रहरीका अनुसार आमा टिकादेवीले आफ्नै ६ वर्षका नाबालक छोरा सागरलाई अंगेनामा आगो फुक्ने ढुंंग्रो र अगुल्टोले हिर्काएकी थिइन् । आमाको कुटाइबाट सागर गम्भीर घाइते भएका थिए । 

इलाका प्रहरी कार्यालय बेलचौताराका प्रमुख प्रहरी निरीक्षक भोजराज पाण्डेका अनुसार जनप्रतिनिधिले खबर गरेपछि प्रहरीले घाइते नाबालक सागरको उद्धार गरि अस्पताल पुर्याएको थियो । उनको हाल पोखरा स्वास्थ्य विज्ञान प्रतिष्ठानको पश्चिमाञ्चल क्षेत्रीय अस्पतालमा उपचार भइरहेको बताइएको छ ।

एक जनप्रतिनिधिका अनुसार बालकको टाउकोबाट धेरै रगत बगेका कारण रगत हाल्नुपर्ने भएको छ । उनको उपचारका लागि अझै केही दिन अस्पताल राख्नुपर्ने चिकित्सकले जनाएका छन् ।