पोखरा

होटल संघ पोखरा नेपालले १७औँ फेवा नव वर्ष महोत्सव गर्ने भएको छ । ३० चैतदेखि १ वैशाखसम्म महोत्सव गर्न लागिएको हो ।

महोत्सवको तयारी सुरु भएको होटल संघका अध्यक्ष लक्ष्मण सुवेदीले बताउनु भयाे । कोभिड १९ संक्रमणका कारण दुई वर्षसम्म महोत्सव हुन पाएन । यसपटक कोरोना केही कम भएकोले महोत्सवलाई निरन्तरता दिन लागिएको उहाँकाे भनाइ छ ।

महोत्सवलाई सञ्चालन गर्न अध्यक्ष सुवेदीको संयोजकत्वमा विभिन्न उपसमितिहरू गठन गरिएका छन् । कोभिड १९ का कारण थला परेको पर्यटनलाई पुनः जागृत गर्न महोत्सवले सहयोग पुग्ने उहाँको भनाइ छ ।

‘अहिले लेकसाइडमा पर्यटक खासै छैनन् । विदेशी पर्यटक त छैनन् भन्दा पनि हुन्छ,’ उहाँले भन्नुभयाे, ‘केही नेपाली पर्यटकका कारण हामी धानिएका छौं । अब विस्तारै इभेण्टमा फोकस गर्नुपर्छ ।’

पछिल्ला दिनहरूमा पोखरामा आन्तरिक पर्यटक निकै बढेका छन् । भारतीय पर्यटकसमेत पोखरा घुम्न थालेका छन् ।

आर्थिक गतिविधि चलायमान बनाउँदै आन्तरिक तथा बाह्य पर्यटन प्रवर्द्धन गर्न महोत्सवले सघाउने होटल संघका पूर्व अध्यक्ष भरतराज पराजुली बताउनु हुन्छ । रेष्टुरेण्ट एण्ड बार एसाेसियसन पोखराले हरेक अंग्रेजी वर्षमा नयाँ वर्ष महोत्सव तथा सडक महोत्सव आयोजना गर्दै आएको छ ।

अंग्रेजी नयाँ वर्ष जस्तै नेपाली नयाँ वर्षलाई स्वागत गर्न हानले कार्यक्रम गर्न थालेको हो ।

होटल संघले गत ८-११ फागुन सम्म ‘जाउँ है पोखरा’ अभियान पूरा गरेको छ ।

पूर्वी नेपालका विभिन्न पर्यटकीय क्षेत्रमा अन्तरक्रिया र भेटघाट गरेर पर्यटक डाकिएको हो ।

सोही क्रममा महोत्सव घुम्नका लागि समेत निम्ता दिइएको सुवेदीले जानकारी दिनु भयाे ।