पोखरा

प्रधानमन्त्री केपी शर्मा ओलीले आफ्नो चुनाव क्षेत्रमा बजेट पार्नको लागी प्रधानमन्त्री कार्यालयकै लेटरप्याड प्रयोग गरेर राष्ट्रिय योजना आयोगलाई योजनाहरुको सूची थमाएकोमा प्रमुख विपक्षी नेपाली कांग्रेसले आपत्ति जनाएको छ ।

कांग्रेस प्रवक्ता विश्वप्रकाश शर्माले प्रधानमन्त्रीले दमकको मेयरको जस्तै व्यवहार देखाई आफ्ना क्षेत्रका लागि आयोजनाको सूची थमाई लोकलाज फालेको टिप्पणी गरेका छन् । प्रधानमन्त्री ओलीको निजी सचिवालयले गत चैत २९ गते राष्ट्रिय योजना आयोगका उपाध्यक्षलाई पत्र लेखेर झापाका विभिन्न ६८ वटा योजनाहरु आर्थिक वर्ष ०७६र०७७ को योजना (बजेट) मा समावेश गरिदिन भनेको थियो । प्रवक्ता शर्माले देशका अरु १६५ निर्वाचन क्षेत्र तथा झापाका अन्य क्षेत्रहरु पनि नसम्झी आफ्नो क्षेत्रलाई मात्र सम्झेको टिप्पणी गरेका छन् ।

प्रधानमन्त्री ओलीले उनको क्षेत्रमा अत्यावश्यक नभएको तर अरु क्षेत्रमा अत्यावश्यक भएको केहि योजनाहरु पनि ओलीले आफ्नै क्षेत्रमा पार्नखोजेको पट्टि शर्माले आपत्ति जनाएका छन् । प्रधानमन्त्री कार्यालयकै लेटरप्याड प्रयोग गरेर आयोजनाको सूची थमाएपछि योजना आयोगको कुन सदस्यले काट्ने हिम्मत गर्ला भनी शर्माले प्रतिप्रश्न गरेका छन् ।