गाजा क्षेत्रमा इजरायलको हवाई आक्रमण
पोखरा
इजरायले गाजा क्षेत्रमा फेरि हवाई आक्रमण गरेको छ ।
हमासले मङ्गलवार बेलुनहरूमा विस्फोटक पदार्थ राखेर इजरायलमा पठाएकाले कारबाही गरिएको इजरायली सेनाले जनाएको छ ।
प्यालेस्टिनी सुरक्षा फौजका एक प्रत्यक्षदर्शीले दिएका विवरणलाई उद्धृत गर्दै बीबीसीले जनाए अनुसार आक्रमणबाट हमासको एउटा रेडियो स्टेसन र एउटा तालिम केन्द्र ध्वस्त भएको छ ।
बुधवार बिहानै भएको उक्त आक्रमणबाट कयौँ स्थानमा विस्फोटनका आवाजहरू सुनिएको जनाइएको छ ।
यसअघि आगलागी गराउने क्षमता भएका बेलुन बम गाजाबाट इजरायलतर्फ पठाइएको थियो । दुवै पक्ष मे २१ मा युद्धविराम गर्न सहमत भए पनि त्यहा हिंसा रोकिएको छैन ।
