कोरोनाबाट पोखरामा थप ४ जनाको मृत्यु
पोखरा
कोरोना भाइरस संक्रमणबाट पोखरामा थप ४ जनाको मृत्यु भएको छ ।
पोखरा महानगरपालिका १ का ४२ वर्षीय कोरोना संक्रमित पुरुषको शुक्रबार बेलुका ७:४५ बजे चरक मेमोरियल अस्पताल पोखरामा उपचारका क्रममा मृत्यु भएको स्वास्थ्य निर्देशनालय गण्डकीले आइतबार बिहान जानकारी दिएको हो । असोज ३० गते उपचारका लागि अस्पताल भर्ना भएका उहाँमा कार्तिक ३ गते कोरोना पुष्टि भएको थियो । उहाँमा कोरोना सँगै निमोनियाको पनि समस्या रहेको निर्देशनालयले जनाएको छ ।
त्यस्तै पोखरा महानगरपालिका-२२ का ६८ बर्षीय कोरोना संक्रमित पुरुषको शनिबार बिहान ०९:३० बजे गण्डकी मेडिकल कलेज पोखरामा निधन भएको छ। उहाँमा कार्तिक ०६ गते कोरोनाको संक्रमण पुष्टि भएकोमा ७ गते उपचारका लागि अस्पताल भर्ना गरिएको थियो । निर्देशनालयका अनुसार उहाँमा कोभिड-१९ सहित निमोनियाको समस्या रहेको थियो ।
पोखरा महानगरपालिका-३१ का ५८ बर्षीय कोरोना संक्रमित पुरुषको शनिबार दिउसो ४:२५ बजे पोखरा स्वास्थ्य विज्ञान प्रतिष्ठानको सघन उपचार कक्षमा उपचारका क्रममा मृत्यु भएको हो । कार्तिक ७ गते शुक्रबार कोरोना संक्रमण पुष्टि भई अस्पताल भर्ना भएका उहाँमा कोभिड-१९ सहित निमोनिया, उच्च रक्तचाप र मधुमेहको समस्या रहेको थियो ।
पोखरा महानगरपालिका-१५ का ५२ वर्षीया कोरोना संक्रमित महिलाको मिति शनिबार राति १०:२० बजे पोखरा स्वास्थ्य बिज्ञान प्रतिष्ठानको सघन उपचार कक्षमा उपचारका क्रममा मृत्यु भएको छ । उहाँमा शनिबार नै कोरोनाको संक्रमण पुष्टि भएपछि उपचारका लागि अस्पताल भर्ना गरिएको थियो ।
यस सँगै गण्डकी प्रदेशमा कोरोनाको संक्रमणबाट मृत्यु हुनेको संख्या ६३ पुगेको छ ।