च्यासललाई हराउँदै जावलाखेल युथ तेस्रो स्थानमा उक्लियो सेतोपाटी संवाददाता
पोखरा
सहिद स्मारक ए डिभिजन लिगमा जावलाखेल युथ क्लब तेस्रो स्थानमा उक्लिएको छ।
मंगलबार एन्फा कम्प्लेक्स सातदोबाटोमा भएको खेलमा जावलाखेलले च्यासल युथ क्लबलाई २-० गोलले पराजित गर्दै तेस्रो स्थानमा उक्लिएको हो।
जावलाखेलको युथको जितमा रुपबहादुर लामा र विजय घलानले गोल गरे।
रुपबहादुरले खेलको ८० मिनेटमा गोल गरे।
२ मिनेट पछि नै जावलाखेलले अग्रता दोब्बर पारे। विजयले च्यासलका गोलकिपर एलन न्यौपानेले क्लियर गर्न नसकेको बलमा रिबाउन्डमा गोल गरेका थिए।
जितसँगै जावलाखेल चार खेलबाट ८ अंक जोडेर तेस्रो स्थानमा उक्लियो। शीर्ष स्थानको मनाङ मर्स्याङ्दी क्लबको ४ खेलबाट १० अंक र दोस्रो स्थानको मच्छिन्द्र क्लबको ८ अंक छ।
च्यासल ४ खेलबाट ४ अंक जोड्दै आठौं स्थानमा छ।
Setopati बाट साभार
