शालिग्राम चोरलाई चार वर्ष कैद



पोखरा

पर्वतको मोदीबेनीस्थित नृृसिंह मन्दिरमा सङ्ग्रहित गरेर राखिएका शालिग्राम शिला चोरी गरेको अभियोगमा पक्राउ परेका चार जना अभियुक्तलाई पर्वत जिल्ला अदालतले कैद र दण्ड जरिवानाको फैसला सुनाएको छ ।

पर्वत जिल्ला अदालतको फैसलाले आरोपित कशम पुनमगर, लेखबहादुर सार्की, सुम गुरुङ र अञ्जल बराइलीलाई अभियुक्त ठहर गरी जनही चार वर्ष जेल सजायसहित रु ४० हजार जरिवानाको सजाय सुनाएको हो ।

आरोपितलाई जिल्ला प्रहरी कार्यालयले गत २६ फागुनमा शालिग्राम शिलासहित नियन्त्रणमा लिएको थियो । चोरी गरिएका ३८ थान शालिग्रामसहित प्रहरीले तीन जना अभियुक्तलाई तत्काल तथा एक जनालाई सोधपुछ र अनुसन्धानका क्रममा पक्राउ गरेको थियो ।

हिन्दू धर्मावलम्बीले भगवान् विष्णुको अवतारको रुपमा पूजा गर्ने शालिग्राम शिला कुश्मा नगरपालिका–४ छमर्केको जङ्गलमा लुकाइछिपाइ राखिएको अवस्थामा भेटिएको थियो । पर्वत जिल्ला अदालतले मुलुकी संहिता ऐन २०७४ को परिच्छेद २० को दफा २४२ अनुसार मन्दिर तथा देवदेवालयमा रहेका सामग्री चोरी गर्नेलाई कम्तिमा दुई वर्षदेखि सात वर्षसम्म कैद सजाय र रु २० हजारभन्दा माथि जरिवाना गर्ने व्यवस्थाबमोजिम उक्त फैसला सुनाएको हो ।

शालिग्राम चोरीको अभियोगमा सजाय भोग्नेमा कुश्मा नगरपालिका–४ का २८ वर्षीय कसम पुन, कुश्मा नगरपालिका–६ बस्ने २९ वर्षीय सुमन गुरुङ, कुश्मा नगरपालिका–१० बस्ने ३२ वर्षीय लेखबहादुर नेपाली र धादिङको नीलकण्ठ नगरपालिका घर भई कुश्मा नगरपालिका–५ मा बस्दै आएका २५ वर्षीय अन्जन बराइली रहेका छन् ।

विसं १८९० मा बनाइएको नृसिंह मन्दिरमा त्यति बेलादेखि नै शालिग्राम शिला राखिएको इतिहास छ । मन्दिरमा १०० ग्रामदेखि ५०० ग्रामसम्मका साना–ठूला शालिग्राम शिला राखिएको थियो । भारतका विभिन्न शहरमा शालिग्राम महङ्गो मूल्यमा बिक्री हुने गरेको छ ।

प्रतिक्रिया दिनुहोस्
Logo
pokharaaaja.com is your news, entertainment, music fashion website. We provide you with the latest breaking news and videos straight from the entertainment industry .

हाम्रोबारे


प्रकाशक/प्रेस प्रतिनिधि:- आशिष भट्टराई

सम्पादक/सञ्चालक:- पुनम भट्ट भट्टराई

रिपोर्टर:- आशिष रानाभाट

रिपोर्टर:- सामुयल श्रेष्ठ

सम्पर्क नं. :- ९८०५८५३४२०

सूचना विभागमा दर्ता नं. : १४०३/०७५-७६

सामाजिक संजाल


©2019 Pokharaaaja